Hepe gihagit magpa-lie detector test

Giahagit ni Bise Mayor Aberdovey Belleza si Supt. Audie Villacin hepe sa kapolisan sa Talisay nga mopaubos sa lie-detector test mahitungod sa pasangil batok kaniya nga modawat og salapi sa mga dinakpan nga mga drug pusher.

Si Belleza atol sa iyang privilige speech kagahapon atol sa gipahigayong sesyon nga ang hinungdan nga walay madakpang dagko nga mga tigpamaligya og shabu sa dakbayan tungod kay si Villacin modawat og salapi gikan sa mga suspetsado aron mapaubsan ang silot niini.

Si Belleza mipasangil usab nga niadtong Hulyo 2005 si Villacin nakadawat og dakong bahin sa P130 mil nga kuwarta kabahin sa drug deal diha sulod sa usa ka tindahan sa dakbayan diin ang courier niini nga usa ka 16-anyos nga batang lalaki gibuhian sa kapolisan apan ang maong hitabo wala ilakip ni Villacin sa iyang OD's (office of the day) report.

Si Belleza nagkanayon nga si Villacin maoy hinungdan sa pagkalagpot sa unom ka polis sa Talisay nga sila si Inspector Ricardo Nayne, SPO4 Reynaldo Vitualia, PO3 Ramil Navarro, PO3 Alexis Racaza, PO3 Limberto Empeynado ug PO1 Marciano Parayday kinsa gipasanginlan nga midawat og kuwarta gikan ni Edna Cabo, gikatahapang drug pusher diha sa Barangay San Isidro.

Apan matud pa ni Belleza nga si SPO1 Archimides Judilla lakip usab sa maong kaso gihatagan og special treatment ni Villacin tungod kay mao kini mitunol kaniya sa P30 mil nga salapi niadtong Hulyo 2005 isip bribe money.

Gibutyag usab ni Belleza nga si SPO1 Reynaldo Hoybia ug SPO1 Ricardo Balbutin kinsa mibabag sa gipahigayong pagsikop sa mga ilegal nga troso nga nidunggo diha sa Barangay Tangke niadtong Nobiyembre 30, 2005 diin ang duha mitanyag ni Ulysis Fernandez, sa Fishermen Sea Ecological Care (FISECA) og P1,000.00 matag semana nga bayad aron mohilom kini.

Apan ang maong tanyag gibasura ni Fernandez ug gihilom usab ni Villacin ang maong insidente tungod kay wala usab kini ilakip sa iyang OD's report.

Si Belleza midungag nga pirmeng ibalewala ni Villacin ang pagtambong sa mga meeting sa traffic commission diin usa siya sa mga miyembro.

Ang Banat News napakyas sa pagkuha kagahapon og tubag gikan ni Villacin kabahin sa mga pasangil ni Belleza batok kaniya tungod kay duna kini gitambongang seminar diha sa Provincial Police Office.

Kahinumduman nga ang konseho sa dakbayan miluwat og resolusyon sa milabay'ng semana aron palagputon si Villacin gikan sa Talisay.

Apan si Mayor Socrates Fernandez mipugong ni Villacin nga magpabiling hepe sa kapolisan sa Talisay kay matud niini wala siya'y nakitang kalapasan nga gibuhat ni Villacin.