Dumpit giduphan ni Osmeña

Giduphan ni mayor Tomas Osmeña ang kontrobersyal nga bodyguard niining si SPO1 Adonis Dumpit gikan sa reklamo sa mga Korean nationals nga pagpang-harras ngadto kanila.

Ang mga nag-inom nga estudyante nga Koreano diha duol sa Cebu Pacific International Languages Services School nga kanhi Harbor View Hotel sa M.J. Cuenco Avenue maoy nireklamo kang Dumpit.

Kini tungod sa giingong gibanggaan niini sa iyang multicab ang mga plastic nga lamesa sa mga kustomer ug nipasalba pa kini og duha ka higayon nga nakapahadlok sa mga langyaw.

Apan alang sa mayor nga dunay ubang mga turista nga mobisita dinhi sa Sugbo ang sobra ka abusado ug gikinahanglan na usab kining badlongon.

Gipahimangnoan hinuon sa mayor ang mga turista ilabi na kadtong mga abusado nga morespeto sa mga balaod nga gipatuman sa dakbayan.

Giangkon mismo sa mayor nga siya sa iyang bahin nakasugat usab sa maong mga pagpangabuso sa pipila ka mga turista nga magpakita sa ilang dili maayong pamatasan sa publiko.

Nasayran nga gipangatarungan ni Dumpit nga igo lang niyang gibadlong ang maong mga Korean nationals nga nagbutang og lamesa ug nag-inom diha sa dalan apan tinguha nga dugokon siya hinungdan nga iyaha kining gipasalbahan.

Samtang ang honorary Consul sa South Korea dinhi sa Sugbu nga si Atty. Agusto Go namahayag sa mga tigbalita nga usa ka dakong sayop ang gihimo ni Dumpit, kini bisan pa man dunay nalapas ang mga Koreano.

Matud pa ni Go, nga angay untang gihimo ni Dumpit mao ang pag-aresto sa mga langyaw gumikan kay usa man kini ka polis.