Wala kaugpo sa kapolisan sila si Castro Sabal, 28, Taner Macalnas alyas Tahir, 23, ug Tata Acang alyas Thods, 19, pulos mga lumad nga taga Dalapang, Labangon Pagadian City.
Ang grupo nila ni Sr. Inspetor Arsenio Bañares maoy nakigsabot kang Sabal aron pagpalit og 50 gramos nga shabu nga may 'street value' nga P200,00 ug anha ang transaksyon buhata sa usa ka mall sa Barangay Tabunok, dakbayan sa Talisay.
Apan matud pa nga idlas ang grupo ug adto sa usa ka parkingan sa usa ka mall sa NRA mitugot nga himuon ang transaksyon, ang mga suspek luwan sa usa ka Honda CRV niadtong tungura.
Dihang positibo ang transaksyon diha na gisikop ang tulo ug wala na kaugpo, nakuha gikan kanila ang usa ka dakong paketeng may sulod nga 50 gramos nga gidudahang shabu, duha ka mahalong cellphones ug ang sakyanan sa mga suspek.
Sumala pa sa PDEA 7 ang tulo mga bag-uhay pang misulod og iligal nga negosyo sa drogas dinhi sa Sugbu sanglit mao pa kini ang unang higayon nga nangasikop ang mga suspek, apan gibutyag nga ang mga suplay niini gikan ra didto sa Mindanao.
Samtang ang mga suspek pulos mihimakak nga nakuhaan sila og drogas sa kapolisan, matud pa nila nahibulong sila human sa ilang pag-shopping gidakop sila diha sa maong mall dihang padulong na sila pauli.
Si Macalnas sa iyang bahin nagkanayon nga padulong na unta siya maghatud sa duha ka kauban diha sa pantalan sanglit manakay na kini og barko pauli sa Mindanao dihang niabot ang mga polis.
Dugang pa sa mga suspek nga usa ka Edna maoy tag-iya sa maong sakyanan, sumala pa sa nanggawas nga report usa kini ka negosyante sa dakbayan sa Talisay.
Ang maong operasyon maoy ikatulong dagkong nahimo sa PDEA-7 karong bulana, diin sa mga nag-unang operasyon nakakuha sila og usa ka kilong shabu gikan sa usa ka drug courier nga tripulante sa usa ka pasaheroang barko gikan sa Ozamis City, ikaduha mao ang pagkasakmit og lain pang usa ka kilong shabu sa mga sakop sa Criminal Investigation and Intelligence Branch ug Vice Control Section sa Cebu City Police Office.