Nangabubho sa magsuon namusil

Usa ka tawo nga gituohang nangabubho namusil sa managsuong lalaki nga naghatod og babaye gikan nga namista ug usa gayod ang namatay niini.

Ang pagpamusil nahitabo sa miaging gabii didto sa Sipakang, Danao, Cebu.

Ang namatay mao si Elbert Casona, 26 anyos, ulitawo ug grabe usab nga naangol ang manghod nga si Joevani Casona, ulitawo ug pulos nagpuyo sa maong dapit.

Si Gomer Rosales, hingkod ang panuigon, ulitawo ug nagpuyo gihapon sa maong dapit nga maoy giingon namusil sa mga biktima mitahan sa kapolisan pipila ka takna ang nakalabay.

Sa imbestigasyon nga gihimo maoy nahibaw-an nga ang managsuon naghatod og babaye nga gikan usab nga namista.

Gisugat kini sa suspetsado ug gipamusil sa makadaghan ug si Elbert nga maoy nagrabehan ang namatay.

Samtang si Joevani nga nakabaton og samad pinusilan sa tuong dughan ang dali usab nga gidala sa tambalanan.

Ang suspetsado nga gitanggong sa bilanggoan gipasakaan kini og kaso sa kapolisan nga murder ug frustrated murder.