Guwardiya gigaid sa 6 ka tulisan

Gitiunan og armas dayon gibinaklid og gapos una pa gipasok sulod sa usa ka delivery truck ang usa ka gwardiya sa unom ka nagmaskarang lalaki nga milungkab sa iyang gibantayang gasolinahan diha sa Maximo Patalinghog Avenue Sitio Sangi barangay Pajo dakbayan sa Lapu-Lapu kagahapon sa kaadlawon.

Nakuha sa mga tulisan ang P211,997.00 nga kinitaan sa Pump Up Petron nga duna say convenience store una pa manglayas ang mga suspek dala usab ang kalibre 38 rebolber sa gwardiyang nakaihi sa kalisang.

Alas singko na sa kaadlawon nadiskubrehi ang gwardiyang si Marcelo Lungcop Jr., hingkod ang panuigon ug molupyo sa Barangay Bangkal sa samang dakbayan, sulod sa giparking nga trak nga may gapos sa pisi sa luyo ug gihigtan ang baba ginamit ang iyang necktie sa uniporme.

Si PO3 Elmer Canillo usa sa mga imbestigador sa maong kaso sa pakighinabi sa Banat News nagkanayon nga si Cernel Alinsog kinsa cashier sa maong tindahan maoy nakabantay nga wala diha sa iyang pwesto si Lungcop.

Nadunggan nalang ni Alinsog ang lagubo gikan sa delivery trak diha sa parkingan, dihang iyang gisusi nakit-an nalang niya si Lungcop sa kahimtang niini maong dali niyang gipahibalo ang mga taxi drayber ug mga istambay diha sa maong dapit aron pagpatawag og polis.Ang mga mirespondeng polis na ang mihubad sa gapos ni Lungcop.

Sumala pa ni Canillo nga usa ka wala mailhing lalaki ang misulod diha sa ilang kasilyas alas 3:30 sa kaadlawon maong iyang gisundan aron badlungon apan wala niya mabantayi nga may usa ka kauban ang suspek ug misunod dayong tion kaniya og armas.

"Nakaihi lagi intawon 'tong gwardiya sa iyang pantalon tungod sa kahadlok, pero nakita namo nga posibleng dunay inside job kay nganong sa tanang mga drawer kadto ramang gibutangan sa kwarta ang giukay nga kasagaran ukayon man gyud na nilang tanan," sumala pa ni Canillo.

Apan nagduda si Canillo sa estilo sa pagtulis gumikan kay bugtong ang drawer ra nga gibutangan sa kwarta ang gilungkab sa mga suspek samtang ang ubang sudlanan wala gani ablihi.

Dako ang posibilidad nga dunay 'inside job' ang hitabo matud pa ni Canillo kay suhito ang mga suspek sa gibutangan sa kwarta, apan wala hinuon matultuli ang gibutangan sa susama usab nga kantidad nga kwarta nga gitago sa laing sudlanan.

Kini maoy ikaduhang higayon nga nabiktima sa mga kawatan ang maong estabilisamento, niadtong milabay'ng tuig gitulis kini sa grupo ni Danny Limotan diin nasikop ang mga kaubanan niini ug narekober ang pipila sa mga kinawat nga salapi ug armas sa mga sundalong namalit niadtong higayuna. -- Uban sa taho ni Romeo Limpangog