30-anyos namatay human gitusaktusak sa gikalalis

Patay ang usa ka 30-anyos nga lalaki human kini gitusak-tusak og dunggab gamit ang usa ka kutsilyo sa iyang kalalis kagahapon sa kadalawon diha sa Phase I, Block 7 Camella Homes Barangay Lawaan dakbayan sa Talisay.

Nakaangkon og mga samad dinunggaban sa iyang lawas si Renante Cadlawon residente sa maong lugar ug dali kining gidala sa Talisay District Hospital apan gideklarar kini sa doktor nga patay na nga naabot sa maong tambalanan.

Ang suspetsadong si Tibo Romero 38-anyos taga phase I, Block 5 Camella Homes sa maong barangay daling miikyas human sa maong hitabo og hangtud karon padayon pa kining gipangita sa mga polis.

Base sa imbestigasyon sa kapolisan sa Talisay ang duha dunay personal nga gilalisa. Mibiya si Romero og mibalik kini sa lugar nga nahitabo ang insidente.

Kalit nga giduol ni Romero si Cadlawon kinsa nagbarog diha sa daplin sa karsada ug sa walay pangutana gideretso kini og dunggab makadaghan.