Dugang police station para sa mga turista

Laing police station ang tukoron dinhi sa dakbayan sa Sugbo karong mosunod nga mga adlaw nga gitakdang mahimutang diha sa barangay Banilad.

Apan ang numeru-unong misyon sa maong tukoron nga estasyonan mao ang pagbantay sa mga turista nga mobakasyon dinhi sa dakbayan matag karon og unya.

Gibutyag ni konsehal Procopio "Coping" Fernandez tsirman sa committee on police fire and penology nga tipik usab kini sa pagpangandam nga gihimo sa siyudad sa gitakdang pag-host sa 12th Asean Summit nga pagahimoon karung bulan sa Disyembre nga pagatambungan unya sa dili muminos 15 ngadto sa 17 ka mga head of state.

Kini pagatawgon unya nga Community Police Action Center kon Compac nga dunay dili muminos 30 ka mga polis. Ang orihinal nga plano niini anha gyud unta kini tukoron sa may bakanteng luna sa Plaza Independencia duol sa Waterfront Police station 3 apan gumikan kay wala man makapasar sa standard sa PNP ang maong lugar nahukman kini nga ibalhin sa may Banilad.

Giklaro sa konsehal nga susama gihapon kini sa ubang mga police station nga mo-atiman sa ubang mga reklamo ug kaso apan ang naka-deperensya lang niini kay prayoridad nila ang pagbantay sa siguridad sa mga turista.

Nunot niini nanghinaut ang konsehal nga magikan sa Police Regional Office (PRO-7) ang mga polis nga madistino unya ning maong bag-ong estasyon aron dili ma-apektuhan ang gidaghanon sa mga polis sa lain laing police station dinhi sa siyudad.