Drug pushers maoy target - Pe

Mopahigayon og imbentaryo ang kagamhanan sa dakbayan sa Sugbo niadtong mga tigpayuhot og gidiling drugas nga padayong naglihuk dinhi sa dakbayan.

Gibutyag ni konsehal Augustus Jun Pe, tsirman sa committee on dangerous drugs nga tumong ug tuyo niini aron usab kabutangan nila og reward system kon ganti kadtong mga drug pushers nga pabiling mabutang sa watchlist dinhi sa dakbayan.

Gitakdang pakigtagboan sa konsehal sila si Cebu City Police Office (CCPO) chief Supt. Melvin Gayotin ug CIIB chief Paul Labra aron bag-ohon ang tanan nilang mga listahan sa mga drug pushers nga padayong naglihok dinhi sa siyudad.

Tinguha sa konsehal nga ilahang masayran kon si kinsa ang mga bag-ong personalidad nga nipalusot og gidiling drugas ilabi na gyud sa shabu dinhi sa dakbayan.

Ang report gikan sa Barangay Anti Drugs Abuse Council kon BADAC ingon man sa kapolisan ug uban pang law enforcement units maoy ilahang basihan sa himoong imbentaryo.

Ang makab-ot nilang kasabutan sa maong tigum gitakda pa hinoong iduso sa konsehal ngadto kang mayor Tomas Osmeña aron kagahinan kini og pundo alang sa pagpabutang og ganti niadtong mga notadong drug pushers dinhi sa dakbayan.