Transport strike ilusad sa NADSU batok sa RVAT

Pundok sa mga drayber sa dakbayan sa Sugbu misaad nga dunay ilusad nga transport strike ang ilang pundok kun ihinayon ang pagpatuman sa dugang dos porsiyentong reformed value added tax (RVAT) sa kasamtangang 10 porsiyento karon.

Si Antonio Pogado sa pakighinabi sa The Freeman/Banat News mibutyag nga giplanuhan karon sa Nagkahiusang Drayber sa Sugbu nga magtigum aron hisgutan ang posibilidad sa paglusad og transport strike kung mahinayon ang pagpatuman sa 12 porsiyentong RVAT karong Pebrero 1.

Matud pa ni Pogado kinsa maoy presidente sa NADSU, nga ang dugang buhisan ug ang padayong pagsaka sa presyo sa petrolyo karon maoy nakapasamot sa kasamtangang kahimtang sa mga kabus ug sa ilang mga drayber.

Gawas sa transport strike tukion usab sa NADSU ang pagpadayon sa petisyong patas-an ngadto sa P7.50 ang pletihan. Ang petrolyo sa bag-ong RVAT gitangtangan og exemption sa buhis apan walay probisyon nga "no pass on" ang maong balaudnon hinungdan nga ang mga oil companies mahimong mopatong niini ngadto sa mga konsumidor.

Ang NADSU sa milabay'ng tuig nangandam na unta sa pagsang-at sa petisyong dugang pletihan nga P7.50 apan wala kini mahinayon gumikan usab sa mga pag-roll back sa presyo sa lana niadtong mga buwan sa Nobiyembre ug Disyembre.

Samtang padayon ang baruganan sa NADSU nga angayang parehason sa rate sa pletihan sa Manila ang dakbayan sa Sugbu gumikan kay walay kalainan ang presyo sa lana dinhi ug didto.

Gawas sa posibilidad nga dunay transport strike nga himuon ang grupo makig-uban usab sila sa mga ipahigayon unyang rallies batok sa implementasyon sa bag-ong buhisan.