1 patay, 2 napagan sa vigilante

Usa ang patay samtang duha ang napagan sa nahitabong pagpamusil nga "vigilante style" diha sa sudlonong bahin sa Purok 3, barangay Camputhaw ning dakbayan niadtong milabay'ng gabii.

Nakabsan sa iyang kinabuhi mao si Nestor Bejec, 26, molupyo sa nahisgutang dapit samtang nangaamong ang duha niini ka higalang sila si John Mervin Dinglasa,38, ug Dario Beñalon, 36, pulos molupyo sa samang lugar.

Si SPO2 Alex Dacua ang imbestigador sa Homicide Section sa pakighinabi sa Banat News mitug-an nga duha ka wala mailhing mga lalaking pulos nagsuot og helmet ang responsable sa pagpamusil.

Matud pa ni Dacua nga gi-parking sa mga suspek ang ilang motorsiklo diha sa tulay sa Escario ug naglakaw nga misulod sa Purok 3 ug diha nakit-an ang tulo nga naghantak.

Dugang pa ni Dacua nga bugtong si Bejec ray tuyo sa mga suspek sanglit base sa mga igo niini tumong kadaghanan sa iyang ulo,nawong, liog ug dughan samtang si Dinglasa naigo diha sa abaga ug si Beñalon diha sa tuhod.

Wala pa hinuon gikumpirmar sa mga imbestigador kung vigilante ba ang mga suspek sanglit matud pa ni Dacua nga dunay posibilidad nga atraso ang motibo sa pagpatay ug gisuhid ra ang estilo sa mga vigilante.

Ang labing ulahing biktima sa gituohang mga vigilante mao ang gilabay nga patay'ng lawas ni Sancho dela Cruz diha sa Ecotech barangay Lahug sa milabay'ng semana, si dela Cruz giingong usa ka ex-convict tungod sa kasong pagpangawat.

"Sa estilo vigilante, pero naa man say uban nga atraso ra usahay sakyan, kay kasagaran nga target sa vigilante kadto mang mga pinangita sa mga polis, dunay mga warrant, criminal records, pero ato sa ning susihon kung naa ni siyay rekord una pa ta makakumpirmar nga vigilante," sumala pang Dacua.

Ang kapolisan nakarekober diha sa crime scene og tulo ka basiyo sa kalibre 45 nga bala.