Tulisan' mi-eskapo sa karsel nasikop og balik

Gidudahang tulisan nga nasikop sa Parian Police Station naka-eskapo sa karsel apan nasikop pag-usab pila ka oras diha sa gitaguang balay sa iyang higala sa barangay Mambaling ning dakbayan kagahapon.

Nabalik sa karsel sa kapolisan ang suspetsadong tulisan nga si Eric Cañedo alyas Dodong, taga Sitio Bonbonan, Tisa ning dakbayan human kini mipuga sa karsel sayo sa kaadlawon kagahapon samtang nag-inusarang gibantayan ni SPO4 Jose Mangaron.

Sumala pa nga si Mangaron kasamtangang nangasilyas dihang miikyas si Cañedo sanglit nianang higayona ang mga kaubanan ni Mangaron sa miscellaneous team nagpatrolya .

Gituohang migamit og alambre sa pagkuot sa kandado si Cañedo aron makagawas, dihang nahuman si Mangaron wala na diha ang suspek.

Ang grupo sa miscellaneous team nga nangabot daling mipahigayon og hot pursuit operation batok sa suspek kinsa nadakpan ra gihapon diha na sa balay sa iyang higala sa Mambaling pagka-alas 8 sa buntag kagahapon.

Usa ka Junrey Añosa, nga taga Golden Ville Village, Banawa barangay Guadalupe ning dakbayan ang nabiktima ni Cañedo diha sa dalan Osmeña Boulevard, barangay Kamagayan ning dakbayan niadtong Lunes sa gabii.

Nakuha kaniya ang usa ka cellphone ug relo de pulso, human sa pagtulis nasikop si Cañedo sa ibabaw sa kisame sa usa ka panimalay diha sa sudlunong bahin sa barangay Kamagayan nianang gabhiona, samtang gipangita pa ang duha niini ka kauban nga giila lang niyang sila si Edwin ug Junjun nga pulos taga barangay Lahug ning dakbayan.