Tulisan gidemalas

Gidemalas ang usa ka gidudahang tulisan human kini masikop sa mga sakop sa Parian Police Station atol sa gihimong follow up operation pagkahuman tulisa ang usa ka 21 anyos, nga PUJ drayber diha sa dalan Osmeña Boulevard, barangay Kamagayan ning dakbayan niadtong milabay'ng gabii.

Nagtingkagol karon sa karsel ang suspek nga si Eric Cañedo alyas Dodong, 19, molupyo sa Sitio Bonbonan Barangay Labangon ning dakbayan samtang gipangita pa usab ang duha pa ka kauban niining iya lang nailhang sila si Eric ug Junjun nga taga barangay Lahug.

Ang hot pursuit operation gihimo sa Parian police nila ni SPO1 Adolfo Morales, PO3 Dhonel Salazar, PO2 Rainer Mahinay ug PO2 Raymundo Supatan human modangop sa ilang buhatan si Jun Rey Añosa, 21, taga Golden Ville Village, Banawa, Guadalupe ning dakbayan.

Sumala pa sa imbestigasyon sa Parian police ang biktima kasamtangang nagpaabot og masakyang PUJ diha sa maong dapit dihang giduol sa tulo ka wala mailhing lalaki ug usa kanila ang mition og armas de fuego diha sa iyang gusok samtang ang usa mikuha sa iyang mga butang, ang usa usab maoy look-out.

Gikuha sa mga suspek ang Nokia 1100 nga nagkantidad og P2,890 ug relo de pulsong casio nga nagkantidad og P2,000, ang mga suspek kalma ra kaayong nanglakaw padulong sa dalan Sanciangko pag-ikyas.

Apan sa gihimong follow up sa Parian police nasikop si Cañedo diha sa sudlonong bahin sa Kamagayan diin nakuhaan kini og usa ka kalibre 38 paltik nga may sulod nga unom ka buhing bala ug ingon man usa ka paketeng mga sulod nga gidudahang shabu.