VKM gipangguba sa MCPO

Mokabat sa 71 ka video karera machine ang gipangguba kagahapon sa buntag sa atubangan sa city hall sa dakbayan sa Mandaue.

Si Mayor Thadeo Ouano, Mandaue City Police Director Eduardo Catabas, Konsehal Pontico Carlo Fortuna nga maoy chairman sa Task Force Video Karera maoy nangulo sa pagbungkag niini nga ginamit ang maso.

Sa pagpakighinabi sa Banat News kang Catabas iyang gipadayag nga ang ilang gibungkag nga mga video karera maoy ilang nasakmit sa pipila pa lamang ka semana nga pag-asumir niya sa katungdanan.

Matud pa niya nga sa mga presinto sa kapolisan sa dakbayan nga naglangkob sa Presinto 3 nga gipangulohan ni Inspector Nicandro Seno nakasakmit niini sa barangay Jagobiao niadtong miaging semana.

Dugang pa ni Catabas nga ang vise squad section nga iyang gitukod maoy iyang gilauman karon nga mohingusog sa ilang kampanya sa tanang ilegal nga kalihokan sa kabarangayan.

Kini himoon aron sa paghatag og katagbawan kang Mayor Ouano nga mibutang kaniya sa puwesto tungod sa pagsalig kaniya.

Si Ouano nga gikahinabi sa Banat News mipadayag nga dako ang iyang pagsalig kang Catabas sa pagmintinar sa kahapsay ug kalinaw sa dakbayan, gani mipadayag ang mayor nga dili usab siya magpanuko sa paghatag sa iyang kinatibuk-ang pagsuporta.