Pusher nasikop sa buy bust

Nasikop na ang usa sa mga dangog nga suspetsadong negosyante shabu sa San Fernando human sa duha ka buwang pagpaniid sa kapolisan, matud pa ni SPO3 Raffy Satera, desk officer sa kapolisan sa lungsod.

Matud pa ni Satera nga una masikop si Josefina Salaritan, misuway pa kini pagdagan ngadto sa bakilid nga bahin sa likod sa ilang balay niadtong Huwebes sa alas 9:30 sa gabii, apan naapsan ra gihapon sa kapolisan.

Ang suspetsado nasakpan sa akto nga namaligya og shabu pinaagi sa usa ka "poseur buyer" sa kapolisan.

Ang buy bust operation sa mga awtoridad nga gipangunahan ni intelligence section chief nga si SPO1 Kenneth Abella, gipahigayon human masuta nga ang suspetsado dili makaikyas.

Dihang nadawat na sa polis nga nagpakaaron-ingnong mamalit og shabu ang tulo ka putos nga shabu gikan sa suspetsado, kalit nga mihugpa ang kapolisan ug dihadiha giposasan ang suspetsado ug dihang gi-injuction ang bulsa niini, nasakmit usab ang mga tin-foil para sa paghingos og shabu.

Apan gumikan sa kaabtik niini mikaratel og dagan apan mas abtik pa kaniya ang kapolisan hinungdan nga nasikop dayon kini.

Matud pa ni Abella nga dugaydugay gyung paniid nila ning maong suspetsado.