Talisay City Jail nagkahuot na

Gidaghanon sa priso sa Talisay City Jail nagkaanam na og huot gumikan kay sa pagkakaron miabot na kini og 245 ka mga piniriso diha sa maong bilanggoan nga milapas na sa limit niini nga 150 ka tawo.

Dul-an sa 70 porsyento sa maong mga piniriso ang dunay kasong gikalambigitan sa drogas ug 30 porsyento lang ang kaso sa tulis, pagpanglugos ug pagpatay.

Gibutyag kagahapon ni Bureau of Jail Management ang Penology (BJMP) chief inspector Johnson Calub kagahapon sa Banat News nga naghuot na gyud ang mga bilanggo sa maong prisuhan sa Maghaway.

Sa maong gidaghanon 215 niini mga lalaki diin 17 kabuok ang mga menor de edad, 31 usab ang mga babaye ug duha niini ang menor de edad usab, ang mga babaye diha gilain sa gikahimutangan sa mga babaye.

Samtang kabahin sa pagkaon gibutyag ni Calub nga matag piniriso dunay P40.00 nga allowance sa ilang pagkaon sa tibook adlaw diin ang BJMP misuporta niini.

Matud pa ni Calub nga ang city jail sa Maghaway wala ikatugyan sa dakbayan ngadto sa BJMP.

Si Calub midugang nga mihangyo na siya sa kagamhanan sa Talisay og pundo para makatukod og laing cottage nga mapuy-an sa mga menor de edad nga piniriso.

Si Calub midugang nga dos porsyento lang sa mga piniriso nga gikan sa Talisay city jail ang makabalik og sulod human makabuhat na usab kini og laing krimen.