Mga 'absinot' nga mga konsehal sa Talisay gibutyag

Upat ka opisyal sa Talisay nga dunay labing daghan og palta sa ilang serbisyo sukad sa buwan sa Septiyembre tuig 2004 hangtod sa Disyembre 2005.

Base sa talaan sa Sangguniang Panlungsod sa dakbayan, ang nag-unang dunay labing daghan nga palta mao si konsehal Alan Bucao diin sugod niadtong Septiyembre 23, 2004 hangtod Disyembre 8, 2005 aduna kini 15 ka palta sa trabaho pito sa maong palta ang "on official business'" upat ang sick leave, duha ang forced leave ug duha usab ang special leave.

Nagsunod si konsehal Shirley nga dunay 14 ka palta nga pulos "on official leave", Ignacio "Iñaki" Jordana nga dunay 12 ka palta, pito ka sick leave, upat ka special leave ug usa usab ang 'on official business", Emilio Go dunay 11 ka palta, siyam niini ang sick leave ug usa ang special leave.

Ang mga opisyal nga dunay labing ubos nga palta nag-una sila si konsehal Bernard Joseph Odilao ug Rodolfo Cabigas sa ilang tag-duha ka palta.

Usa ka sick leave ug "on official business" ang palta ni Odilao ug pulos "on official leave" ang palta ni Cabigas.

Si konsehal Arturo Bas dunay tulo ka palta nga pulos "on official leave", Sabeniano Abatayo upat ka palta, usa ang forced leave, usa ang special leave usa ang "on official business" ug usa ang sick leave.

Si Bise-mayor Aberdovey Belleza ug kosehal Sergio Restauro parehong dunay pito ka palta.

Pulos "on official business" ang palta ni Belleza, upat ka "on official business", duha ka special leave ug usa ka forced leave ang palta ni Restauro.

Si Association of Barangay Captain (ABC) presidente Osmundo Manreal Jr. ug SK federation chairman Joe Florence Bas parehong dunay walo ka palta.

Unom ka sick leave ug duha ka "on official leave" ang palta ni Manreal, lima ka sick leave, duha ka "on official business" ug usa ka special leave ang palta ni Bas.