Si Pagasa Mactan Meteorologist, Jun Amarillo sa pakighinabi sa The Freeman/ Banat News mibutyag nga gipaabot nga mosulod dinhi sa nasud ang mga Tropical Depression kun bagyong Basyang, Aloy, Domeng, Ester, Florita, Gloria, Henry, Inday, Juan, Katring, Luis, Melenio, Neneng, Ompong, Paeng ug Queenie, Reming, Senyang, Tomas, Osman, Venus, Waldo, Yayang ug Zeny.
Kagahapon unang misulod sa Philippine Area of Responsibility ang bagyong Agaton diha sa may Eastern Samar diin ang signal number one giisa lakip na sa Western Samar, Homonhon Islands sanglit nagpadulong ang maong bagyo sa kasadpan amihanang kasadpan padulong sa Eastern Visayas.
Matud pa ni Amarillo nga luwas ang Central Visayas sa hulga sa maong bagyo sanglit nagkalayo ang maong bagyo sa rehiyon.
Ang mata sa bagyong Agaton nasigpatan 180 kilometros sidlakan sa Guiuan, Eastern Samar dala ang kinakusgang hangin nga 45 kph ug naglihok padulong sa kasadpang amihanang kasadpan sa gipaspasong 11 kilometro matag oras.
Gipaabot ugmang adlawa nga moabot ang bagyong Agaton 150 kilometro sa amihananng bahin sa Guiuan, Eastern Samar kun 120 kilometro silangang bahin sa Catarman, Northern Samar ug 40 km habagatang kasadpan sa Masbate karong Miyerkules sa buntag.
Nunot sa maong mga umaabot nga mga bagyo karong tuiga mipahimangno ang Pagasa sa mga residente sa mga dapit nga maigo sa bagyo gumikan sa posibleng pagbaha ug landslide.