Shabu, armas nasakmit

Nasakmit sa mga sakop sa Cebu Police Provincial Office ang pinaketeng shabu ug mga armas atol sa gihimong ronda sa lungsod sa Sibonga ug Argao niadtong Domingo.

Ang hiniusang pwersa sa Provincial Intelligence and Investigation Branch ug Special Reaction Unit sa CPPO unang nironda sa panimaye sa managsoong Jerwin ug Reland Decierdo alas 6 sa buntag sa barangay Tubod lungsod sa Sibonga.

Nakuha gikan sa panimaye sa managsoong Decierdo ang siyam ka medium size nga paketeng shabu.

Wala sa ilang panimaye ang nahisgutang managsoon sa dihang gihimo ang ronda apan gisaksihan kini sa usa nila ka sakop sa pamilya nga si Josephine Decierdo ug barangay tanod nga si Carlito Pañit.

Alas 7:30 sa buntag sa maong adlaw, nironda na usab ang grupo nga gipanguluhan ni Police Insp. Wilfredo Pulvera sa panimaye sa usa ka Serafin Rellen sa sityo Lalaan, barangay Bulasa, Argao.

Nasikop si Rellen ug nasakmit gikan kaniya ang usa ka 357 paltic revolver nga dunay unom ka bala.

Nianang pagka alas 3:30 sa hapon sa mao gihapong adlaw, ang panimaye na usab sa usa ka Marciano Naason sa barangay Tubod, lungsod sa Sibonga ang gironda sa PIIB ug SRU.

Nasikop si Naason ug nasakmit gikan kaniya ang usa ka 357-caliber pistol.