15-anyos-gipatay sa sikyu

Patay ang usa ka 15 anyos nga tinun-an sa high school human kini pusila sa usa ka guwardiya sa usa ka poultry farm diha sa barangay Tabok, dakbayan sa Danao sa pagdudang usa kini ka "kawatan" niadtong nakalabay'ng adlaw.

Napalgang nagbuy-od diha sa sulod sa poultry farm ang biktimang si Erwin Arias, molupyo sa nahisgutang lugar ug tinun-an sa usa ka pampublikong tunghaan sa maong dakbayan.

Matud pa nga dunay mga kawani sa Quality Poultry Farm sa nahisgutang barangay ang mipahibalo sa kapolisan kalabot sa pagsulod sa grupo sa mga batan-ong milayat sa konkretong paril sa farm ginamit ang usa ka improvised nga hagdanan ug gidudahang nangawat og mga manok.

Ang guwardiyang si Erwin Manosa giingong maoy nakasakop kanila diin ang usa sa mga "kawatan" gipusil niini ug gituohang naigo.

Base sa gihimong imbestigasyon ni SPO1 Allan Muñoz human makadawat sa alarma girespondehan kini nila ni SPO4 Ramerito Ramonida ug diha na napalgi ang nagbuy-od nga lawas sa biktima.

Nakaangkon kini og samad pinusilan diha sa luyo sa hawak niini nga gituohang hinungdan sa hinanali niining kamatayon, samtang ang suspek daling miikyas ug wala na igkita karon sa kapolisan.

Gikatahong gibiyaan sa mga kauban si Arias human makamatikod nga miabot ang guwardiya ug nag-iyahay na lang og pangikyas ug gibilin ang samarang kauban.