16-anyos gilugos sa 18-anyos

Usa ka 16 anyos nga dalagita midangop sa kapolisan ug mitahong gilugos sa iyang silingang 18 anyos samtang natulog diha sa usa ka barangay sa Daanbantayan, niadtong nakalabay'ng Enero 8.

Ang suspek kinsa nasikop ni PO1 Dario Loyola giilang si Benjie Pepito, 18, lumad nga taga Negros Occidental ug kasamtangang nagpuyo diha sa samang barangay diin magpuyo ang biktima.

Ang biktima lumad nga taga Malabuyoc apan diha lang mipuyo sa balay sa iyang iyaan sa Daanbantayan.

Matud pa sa biktima kasamtangan siyang natulog sa iyang lawak sa balay uban sa anak sa iyaa dihang pagkakadlawon misulod ang suspek sa iyang kwarto ug milugos kaniya.

Ang biktima mitug-an sa iyang iyaan kinsa mao usab ang midala kaniya sa kapolisan hinungdan sa pagkaaresto sa suspek, samtang gipailawom na usab sa paghiling sa mananambal ang biktima.