Ang inugurasyon sa bag-ong customshouse duol sa yarda sa Cebu International Port (CIP), gitambungan nila ni Finance Secretary Margarito Teves, Customs OIC Commissioner Napoleon Morales, District Collector Mangaoang, ug mga opisyal ug mga kawani sa BOC-Cebu.
Human sa ribbon-cutting, ang maong mga opisyal ug mga kawani sa adwana mibukas sa usa ka container van nga adunay sulod nga duha ka right-hand drive nga Mercedez Benz ug usa ka BMW nga nagkantidad og P3 milyones nga naka-consign sa Saturn Trading ug dayong misaksi sa pagligis sa pison sa libuan ka mga pirated DVDs.
Si Mangaoang, atol sa press conference human sa inugurasyon inubanan nilang Teves ug Morales, nagkanayon nga mas mopaspas pa ang pagserbisyo sa mga importer nga mo-file sa mga dokumento sa ilang mga kargamento, ilabi na nga ang bag-ong customshouse duol na sa one-stop-shop.
Laing gitanyag ni Mangaoang mao ang pagpakubos sa pirma sa top five nga mga importer nga mao ang Transco, Norkis Trading, San Miguel Corp., Galva Phil., ug Energizer.
Mipasalig usab si Mangaoang nga suportahan sa iyang liderato sa Port of Cebu ang mga plano Morales pagkolekta sa naka-assign nga target sa customs nga P192 bilyones ning tuig 2006.