6-bulan suspenso sa mi-peke gipaandam na

Gimanduan ni Mayor Tomas Osmeña ang City Attorney's Office pinangulohan ni City Attorney Rodulfo Golez sa pagpreparar sa unom ka bulan nga suspension order batok sa mga kawani sa dakbayan sa Sugbo nga nalambigit sa pagpalusot sa mga peke nga business permit ngadto sa pipila ka mga establisemento dinhi sa dakbayan.

Personal nga gitawagan sa mayor si Golez sa iyang cellular phone aron dalion ang paghimo sa maong preventive suspension batok sa mga kawani sa City Hall nga nalambigit sa maong binuang.

Giawhag usab ni Osmeña si Golez nga mohimo og pakisusi sa buhatan sa National Bureau of Investigation (NBI-7) aron pagkuha sa lista sa mga pangalan sa mga kawani sa City Hall nga napasakaan og kaso gumikan sa maong binuang.

Tinguha sa mayor nga mapaubos sa suspension order ang maong mga kawani samtang magpadayon ang husay sa ilang kaso nga gi-atubang.

Apil sa girekomendar sa NBI nga pasakaan og kaso mao ang computer operator sa MICS nga si Sherwin Baguio ug ang kanhi kawani nga si Emberto Cabigon gumikan sa paglambigit niini sa pag peke sa business permit nga giisyo ngadto sa Nolsie Trading nga nahimutang diha sa may dalan V. Gullas.

Ang desisyon sa korte sa kaso sa mga kawani sa City Hall nga gilambigit sa maong binuang maoy iyang basehan kun angay pa banang pabalikon og trabaho ang maong mga kawani.