Namato sa silingan gipatay samtang natulog

Wala na makamata gikan sa iyang pagkatulog ang usa ka lalaking gipasanginlang namato og balay dihang nahubog kini sa milabayng gabii human ang tagbalay misulong sa balay sa biktima ug gipusil samtang kini natulog.

Patay na dihang naabtan sa iyang igsuon ang biktimang si Ronald Abalde alyas Onat, 27, molupyo sa Sitio Plastikan, barangay Duljo-Fatima ning dakbayan.

Gitumbok nga mipusil kaniya mao si Gilbert Lorbedas,hingkod ang panuigon ug molupyo usab sa nahisgutang dapit.

Sumala pa sa testigo ngadto sa Homicide Section samtang siya nanglaba diha sa ilang tugkaran miabot ang suspek ug gipangita ang biktima maong iya kining gitug-anan nga natulog kini sa iyang lawak.

Human tug-ani daling misulod sa balay sa biktima nga suspek ug diha-diha duha ka sunod nga buto sa armas ang nadungog gikan sa sulod sa balay ni Abalde, dangtan pila ka gutlo nagdaling migawas si Lorbedas sa balay hinungdan nga nagduda ang mga residente.

Dihang gisubay diha sa sulod sa lawak sa biktima nagkadugo na kini sa ulo ug wala nay kinabuhi, nakaangkon ang biktima og duha ka samad pinusilan sa walang bahin sa iyang ulo.

Sumala pa sa Homicide Section ang biktima nga hubog nianang tungang gabii gipasanginlang maoy namato sa balay sa suspek gidudahang gikasuko kini sa naulahi.