CCUVA supak sa demolisyon sa Magellan's cross vendors

Supak ang Cebu City United Vendors Association kon CCUVA niining plano sa siyudad nga pagpatuman sa demolisyon ngadto sa dul-an sa 20 ka mga manindahay og imahen sa mga santos sa palibot sa Magellan's Cross kilid nga bahin sa Basilica Minore del Sto. Niño ugma.

Gibutyag ni Maria Pino, chairman sa CCUVA nga inay nga demolison ang maong mga vendors mas maayo nga i-regulate lang kini gumikan kay nakatampo man ang mga pagpaninda niini og mga imahen sa santos ingon man souvenir items ug mga kandila sa palibot sa Magellan's Cross nga usa sa mga giilang tourist destination sa Sugbo.

Magpakita usab sa tinuoray'ng kultura sa mga Pilipinhon ug Sugboanon ang mga manindahay og imahen sa mga santos sa palibot sa maong Magellan's Cross, dugang pa niya.

Matud ni Pino dili ang mga manindahay og imahen sa mga santos nga diha na sa maong lugar sulod sa dugay nang mga katuigan ang nakahatag og kahugaw sa lugar gumikan kay daan na kini sukad pa kaniadto.

Hinuon ang mga bag-o nga manindahay og pagkaon maoy gitumbok nila nga nakahatag og kasamok sa lugar.

Girekomendar sa CCUVA nga i-renovate ang mga paninda sa maong mga vendors diha sa lugar ug obligahon kini nga magsul-ob og limpiyo nga sinena sa ilang pagpaninda ingon man ipa-ubos sa subsob nga pagbansaybansay may labot sa ilang pagpaninda ug pakig-atubang ilabi na sa mga langyaw'ng mga kustomer.

Gihulagway ni Pino nga nagpakita sa pagka Kristiyano ang pagpamaligya og souvenir items sa maong lugar nga dili angay'ng tandugon ug hilabtan ug angayan pa gani nga tabangan.

Nanghinaot ang CCUVA nga paminawon sa syudad ang ilang mga giduso nga awhag alang sa interes usab sa mga vendors sa maong lugar.

Nasayran nga gibutyag ni Osmeña nga dili na siya maminaw sa hangyo sa maong mga vendors og ipatuman na ang demolisyon ugma human mapupos ang tagal iyang gihatag nga pagpaninda niini sa maong dapit hangtud sa Sinulog.

Matud sa mayor ma-usab lang ang iyang desisyon kun mo-withdraw ang Parks and Playground sa ilang reklamo batok sa mga vendors sa Magellan's cross.