Ang mga cast sa maong reality show nga sila si Cassandra, Nene, Francine, Jason ug uban pa maoy gihugyawan sa mga tawo gani daghang mga tawo ang wala na mopatuo sa mga polis nga nagbantay sa linya.
Kini dihang ang mga fans migara human may mga miyembro sa PBB ang mihatag og kahigayonan aron mo-autograph sa ilang mga panyo, t-shirts, bullcap ug uban pang mga butang nga giitsa sa float.
Pipila ka mga polis nga sakop sa Regional Mobile Group nga nagbantay diha sa kadalanan wala makapugong sa mga tawo nga nanulod na sa rota sa parada ug nangitsa sa ilang mga butang nga buot nilang mabutangan og autograph ug makakuha og mga hulagway.
Duha ka mga sakop sa escort motorbikes gani ang misuway og santa sa mga tawo dihang gihugupan ang float diha sa may crossing sa Echavez, Gorordo ug Mango Avenue apan wala kini panumbalinga sa mga tawo bisan nakamugna na kini og aberiya sa dagan sa parada.
Nunot niini gipasulod una sa float ang mga cast aron dili na makabalda sa dagan sa parada ang mga fans nga nanghugop sa palibot sa float.
Si Cebu City Police Office director Melvin Gayotin pagkahibalo sa hitabo mibutyag nga dili husto ang pag-entertain sa tawo pinaagi sa pag-autograph kay maangin ang parada, nunot niini iyang gitawgan si Bise Mayor Michael Rama kun mahimo bang did-an ang PBB sa pag-entertain sa buot magpa-autograph.
Usa ka bata gikatahong gustong makakita sa mga housemates apan dihang miambak na siya sa trak nasangit ang iyang singsing nga nakaingon sa pagkahilos sa iyang tudlo.