Mga pusher sa Pitalo puhagon

Gipunting karon sa kapolisan sa San Fernando ang kampanya sa pagpuhag sa grupo sa mga pusher sa shabu diha sa sitio Lakaron, barangay Pitalo sa maong lungsod.

Matud pa ni SPO2 Victor Bueno, desk officer sa San Fernando Police Station, kini ang gihatagan og konsentrasyon karon sa ilang bag-ong hepe nga si Senior Inspector Ramon Ortiz.

Hinuon wala mapakyas ang ilang kampanya kay nasikop dayon nila ang usa ka banggiitang pusher nga si Lloyd Cosca Y. Abellanosa, 23, ulitawo, taga sitio Tapon, South Poblacion, San Fernando niadtong Huwebes sa ala-1:00 sa hapon.

Nasakmit sa kapolisan gikan sa mga kamot sa suspetsado mao ang usa ka putos nga shabu, tin foil ug disposable lighter.

Matud pa ni Bueno nga dugay nang panahon nga nabaniog ang sitio Lakaron nga maoy pinuy-anan sa mga illegal drug pusher.

Namatud-an nila kini, dihang nadakpan nila si Cosca kay mitug-an kini sa kamatuoran.

Ang sitio Lakaron maoy bugtong lugar sa San Fernando diin nagikan ang suplay sa shabu alang sa mga tiggamit niini.

Hinuon sa ilang pagpaniid, walay mga dagkung negosyante og shabu sa maong lugar, matud pa ni Bueno.

Wala pa usab nila masuta asa mangompra og materyal nga shabu kining mga drug pusher sa maong lugar.

Hinuon karong anaa na sa prisohan ang ilang dinakpan, nagtuo ang kapolisan nga makakuha pa sila'g dugang kasayoran niini. - Wen Celen