Mitaligsik sa unang Sinulog

Ato na sang gisaulog ang kasumaran sa unang pagpahigayon sa Sinulog sa Sugbo ang unang opisyal nga ngalan nga gihatag niini sa tigpasiugda nga si kanhi MYSD Regional Director David "Boy" Odilao Jr.

First year pa ako sa high school adtong higayona ug bisan nanaligsik -- dili sad kusog apan igo gyung makabasa kanato -- miposisyon gyud ko daplin sa dan diha sa may city hall diin maoy unang giagian sa prosisyon o parada ba kadto. Mga alas 10 ang takna sa buntag kadto. Gamay ra ang nanan-aw sa dan.

Hapit tanang pribadong eskuwelahan sa dakbayan adunay representasyon. Contingent na karon ang tawag niini. Matag contingent adunay mga 20 tingali to ka sakop nga nagsul-ob og luho kaayo nga mga sinina. Mestisa dress ang tawag sa uban. Naa say nitawag niini nga gown.

Mga guwapa ang mga sakop sa matag contingent. O ba kaha pinaguwapa. Nagda silag kandila. Ug misayaw sa sinulog samtang naghinay-hinay irog ang procession diin adunay akompanimento nga tukar sa tambol.

Sumsa sa akong nahibaw-an nga kadtong mga contingent sa mga guwapa ug guwapo nga sinulog dancers gitun-an gayud sa pagsayaw sa hustong sinulog ubos sa usa ka inilang dance instructor kun choreographer gikan sa usa ka unibersidad dinhi sa dakbayan.

Wala dangtig dugay nikusog ang panaligsik ug gani nibundak gyud ang uwan apan nagpadayon gihapon sa pagsayaw sa sinulog ang mga sakop sa mga contingent nga nangapil sa prosisyon.

Kun sa sports pa, medyo nadaut ang "game plan" sa mga organizer sa unang sinulog tungod sa uwan, apan paghunong sa uwan ila nasad gipadayon ang prosisyon.

Karon daghan ang nagtuo nga kadtong taligsik nga nahitabo pagsugod gyud sa sinulog festival maoy bendita gikan sa langit nga namendisyon sa bililhong proyekto ni Sir Boy Odilao.

Usa na karon ka dako nga kalihukan ang Sinulog festival nga maoy nagpasiugda ang usa ka tawo nga ato na karon ginganlan nga "Father of the Sinulog."

Sa sinugdanan walay mga dagkong opisyal sa kagamhanan nga nihatag og dakong importansya sa proyekto ni Ginong Odilao apan karon nag-inilogay na kadunganan nga nahimo ang maong kalihukan.