Pag-oktaba sa realty tax wa ikalipay ni Tom

Wala malipay si Mayor Tomas Osmeña dihang nahibaw-an niini nga gi-planohan sa konseho nga isibog unya na sa Enero 1, 2007 ang pagpatuman sa City Tax Ordinance nga nagpahamtang og dugang 30 porsiyento sa real property tax dinhi sa dakbayan sa Sugbo.

Kini subay sa proposed ordinance nga gipasar ni Konsehal Jocelyn Pesquera atol sa sesyon sa konseho sa dakbayan kagahapong adlawa.

Nasayran nga una nang gi-suspenso ni Osmeña ang gitakdang pagpatuman sa maong ordinansa sa pagsugod gyud unta karung tuiga gumikan kay gusto sa mayor nga ipatuman ang gamay'ng kausaban sama sa pag-angay sa assessed value sa mga propriedad dinhi sa dakbayan.

Kini sama sa assessed value sa mga propriedad diha sa barangay Lahug nga mas taas kun itandi sa propriedad sa may barangay Apas.

Apan sa pagpakigtigum sa mayor ngadto sa mga sakop sa konseho gipahibalo niya nga kutob lang karong bulan sa Abril ang pag-suspenso nga himuon og human niana hingpit nang ipatuman ang maong tax ordinance aron makolektahan na og dugang 30 porsiyento nga buhis ang mga kabtangan dinhi sa siyudad.

Apan human mahibaw-i sa mayor nga plano kining isibog unya sa Enero sunod tuig iyang giklaro nga dili na siya makapaabot pa sa maong gidugayon ug kun aprobahan gyud kini sa konseho mibahad siya nga iya kining i-veto.