Anak 'gilansangan' gigamit sa pangilad

Amahan nga midangop sa Vicente Sotto Memorial Medical Center nga nagdala sa iyang anak nga giingong gilansangan sa ulo sa "nangabit" niyang asawa miikyas kagahapon sa kaadlawon dala ang batang pasyente diha sa maong tambalanan ug nahibaw-ang usa diay ka mangingilad ug duna nay rekord sa kapolisan sa Danao City.

Si Chief Inspector Larson Dechino sa pakighinabi sa Banat News mibutyag nga usa ka mangingilad si Roy Pareja Sr. kinsa ang tinuod nga pangalan Joselito Taroja, nga taga Compostela dili taga Lawaan, Danao City.

Sumala pa ni Dechino nianang gitawgan sa Banat News ang ilang buhatan sa milabay'ng adlaw kabahin sa krimen sa Lawaan dali nilang giadto ang dapit aron mag-imbestigar apil na sa Danao District Hospital ug ang drayber sa ambulansiya kabahin sa pasangil ug ang kapitan sa barangay ug guwardiya ni Mayor Ramonito Durano III kinsa giingong maoy mibalibad kang Taroja alyas Roy Pareja Sr. nga makadangop sa mayor, apan nasutang pulos negatibo ang gipanug-an ug gipasangil ni Taroja.

Dihang nakit-an ni Dechino ug mga sakop ang hulagway ni Taroja sa telebisyon nga nagpakitabang namay-ungan nila kini nga ang mangingilad nga mananambal sa Danao City nga ila nang nadakpan niadtong Nobiyembre 12, 2002 gumikan sa paghupot og kalibre .357 nga walay lisensya samtang namaligya og tambal.

Dugang pa ni Dechino nga makadaghan na nadakpan si Taroja sa ilang buhatan ug mangilad kini gamit ang anak nga "bakol" apan kanunay lang pasayluon sa mga reklamante gumikan kay maayo kini "mo-drama."

"Giilad lang ta ana ni Taroja sir, hasta namo diha sa media, daghan na siya og nailad diri kay nagpatuo man siya nga mananambal pero iya usab na gamiton taming iyang anak nga bakol sa pangilad niya. Duda gani namo ana siya ray miabuso anang iyang anak," asoy pang Dechino kinsa miangkong nakadawat og pagsaway sa katawhan gumikan sa pagbuto sa maong balita nga daw wala silay kalibutan sa nanghitabo sa iyang hurisdiksyon.

Ang pag-ikyas karon ni Taroja dala ang anak nga si Roy "Dodong" Jr., nakapatumaw sa dakong pagduda sa mga kadagkuan sa VSMMC ug kapolisan nga usa na usab ka "raket" sa pagpangilad ang gihimo sa amahan nga migamit sa iyang anak.

Si Taroja nakadawat og wala matinong kantidad gikan sa mga maluluy-ong Sugbuanon nga mihatag kanila og hinabang gikan sa pagkaon, tambal ug kuwarta aron katabangan ang bata, apan nasutang daw usa ka pangilad ang gihimo ni Roy Sr. dili lang sa mga Sugboanon kun dili lakip na mga sakop sa media nga maoy miabag kaniya pagpanawagan ug pagpangayo og tabang.

Si Eleodoro "Nonoy" Mongaya,Jr. ang public relations ug media committee sa VSMMC mitug-an sa Banat News nga daan nang kadudahan ang gipamulong ni Roy Pareja Sr. kabahin sa sirkumstansya sa gidangatan sa anak niini.

'Nagduda nako daan niadtong buntag pa sa mga gipanug-an sa amahan, pero dili man ta makakumpirmar sa atong pagduda kay wala may makapamatuod, pero kung wala pa iikyas ang bata magpadayon pa unta 'to ang medikasyon karon kay naigo man og mild tetanus infection base sa admitting diagnosis," asoy pang Mongaya kinsa nabalaka sa kahimtang sa bata.

Dugang pa ni Mongaya una pa ang pag-ikyas alas 3 sa kaadlawon mihimo na og senaryo si Roy Sr. nga kun dunay milabni sa iyang kwintas nga "silver" (nga namatikdan usab sa Banat News diha sa liog niini) diha sa atbang sa ward 10 diin mahimutang ang iyang anak, apan miangkon dihang nangabot ang mga guwardiya nga nagtiaw-tiaw lang siya.

Usa sa mga babayeng guwardiya sa manag-amahan mitug-an sa Banat News niadtong milabay'ng adlaw nga gipasirad-an ang usa sa duha ka mga pultahan sa ward 10 aron mabantayan ang duha gumikan kay misuway na kini og ikyas niadtong milabay'ng Lunes sa hapon.

Ang Banat News nakakita sa kahimtang sa makaluluoy nga kahimtang sa bata, apan makapaduda ang gitudlong samad diha sa tuong bahin sa luyo sa ulo niini gumikan kay nabuni na kini nga matud pa sa amahan maoy gilansangan sa inahan nga si Gevelyn Capote niadtong Disyembre 30.

Gipasanginlan pa ni Roy Pareja Sr. ang Danao District Hospital nga wala mohatud sa iyang anak sa ambulansya padulong sa VSMMC gumikan kay wala siyay P150 nga pang-krudo.Gani iyang gibalik sa ilang balay ang bata sa Barangay Lawaan apan niadtong Lunes sa kaadlawon giputos na lang niya ang anak sa habol ug nagbaklay nga gidala sa VSMMC ang bata.

Nagbaha ang mga hinabang nga gipasiugdahan sa mga lokal nga mga media outfits sa dakbayan aron matabangan ang bata bisan paman sa kadudahang pangangkon niini gumikan kay nakita sa mga tigbalita ang kahimtang sa bata.