Milugos sa dalagita sa recla nasikop sa SWAT

Usa ka tawo nga gialegar nga nangilad ug milugos sa minor de edad nga dalagita sa awaaw nga dapit sa North reclamation Area sa Subangdaku, siyudad sa Mandaue nadakpan sa mga polis human usab mailad sa biktima nga nahimo niining textmate.

Gihimo ang pagdakop sa suspek alas 2 pasado ang takna sa hapon niadtong miaging adlaw sa SM City, dakbayan sa Sugbo.

Ang nadakpan mao si Victor Nacua, alias Jake, 33 anyos, ulitawo nga lumad nga taga Costia sa Daanbantayan, Cebu ug temporaryong nagpuyo sa V. Rama Avenue Englis sa dakbayan sa Sugbo.

Ang suspek nadakpan nila ni SPO4 Eddie Casas ug PO1 Gler Cuizon nga mga sakop sa Special Weapon and Tactic (SWAT) sa Cebu City human ang biktima misumbong sa mga ginikanan kinsa mitaho usab sa kapolisan.

Si PO3 Ronie Acar sa Presinto 2 sa Subangdaku nga gikahinabi sa Banat News miingon nga Biyernes sa alas 8 sa gabii nga nahitabo ang paglugos didto sa FF Cruz sa Reclamation Area.

Dugang pa ni PO3 Acar nga nag-atang ang biktima og PUJ sa gawas sa SM City niadtong Biyernes paingong pauli sa ilang panimalay sa dalan A. del Rosario sa barangay Guizo sa maong siyudad.

Ang suspek nga nagsakay og motorsiklo mihunong ug nakighimamat sa biktima ug mitanyag pa nga tabangan sa pagsulod og trabaho sa mga pabrika sa MEPZ sa dakbayan sa Lapu-Lapu ug gipaangkas sa motorsiklo hangtod gidala sa reclamation area ug milampos sa paglugos kaniya.