'Kampante' si Tomas pagkandidato ni Guardo

Giangkon ni Mayor Tomas Osmeña nga dili siya makapugong sa kanhi tsirman sa Cebu City Sports Commission Jonathan Guardo kun mohinayon gyud kini sa plano niini nga magpapili pagka kongresista sa habagatang bahin sa siyudad sa Sugbo atbang kang Kongresista Antonio Cuenco sa 2007 nga eleksiyon.

Matud sa mayor dili siya ang klase sa politiko nga mogawong niadtong mga tawo nga dunay ambisyon sa politika. Giklaro himuon niya nga dili ang Bando Osmeña Pundok Kauswagan (BOPK) maoy mopadaog og kandidato kun dili ang mga molupyo sa dakbayan.

Hugtanong gihimakak ni Osmeña nga iyang gibadlong ug gipugngan si Guardo sa laraw niini nga molansar pagka-kongresista atbang kang Cuenco nga kaalyado sa BOPK.

Hinuon gibutyag sa mayor nga higayon na unta nga makakuha siya og lig-ong suporta sa publiko ilabi na kun misanong pa kini sa iyang mga pahimangno nga paghatag og husay sa kinatibuk-ang nagastu sa milabayng 23rd Southeast Asian Games dinhi sa dakbayan aron paglikay sa mga pagduda nga gibulsa ang ubang gahin gikan sa mga sponsors.

Hinoon gihimakak usab ni Osmeña nga politika ang hinungdan sa iyang pagkuwestyon ni Guardo sa pagdumala sa milabay'ng SEA games isip tsirman sa CebuSOC gumikan kay igo lang siyang nangayo og hustong husay aron mahibaw-an kun unsay gigastuhan sa gahin nga gihatag sa mga sponsors sama sa Smart, Globe Telecom, PLDT ug uban pa gumikan kay gihatagan kini og gahum sa siyudad nga maka-solicit niadtong higayona.