Ang maong resolusyon naghangyo nga adto tukuron ang presinto sa barangay Busay duol sa agianan padulong sa Tops, tinguha sa mga kapitan sa mga lugar nga mapadali ang pagtubag sa kapolisan kun dunay alarma.
Dugang pa niini ang kabalaka sa hulga karon sa mga rebelde diha sa kabukiran sanglit nagtuo ang mga opisyales nga mas dako og impact kun presinto gyud ang ibutang sa ilang lugar.
Sa pagkakaron ang Cebu City Police Office, Security Service Group ni Supt. Mariano Natuel dunay 11 ka mga police detachments nga gibantayan sa maihap lang nga polis nga giubanan sa mga barangay tanod ug mga sakop sa barangay intelligence network.
Ang onse ka mga barangay kapitan mao sila si Aurelio Laspoña, Prescillo Alborez, Jesus Bontuyan Jr., Nieves Narra, Jose Cadampog, Rodulfo Mabini, Dante Tabucal, Ana Tabal, Jesus Bontilao, Rosalita Callino ug Emiliano Gabiana.
Ang resolusyon sa onse ka kapitan anha gipaabot kang Association of Barangay Council Presidente Eugenio Faelnar, dugang niini ang suwat alang kang Mayor Tomas Osmeña kalabot sa maong request.
Duha na ka mga nanglabay nga mga hepe sa CCPO ang mipadayag sa tinguhang matukuran og ika-dose nga presinto kaniadto pa og anha kini ibutang sa bukirong bahin sa dakbayan gumikan usab sa nakitang kalisod alang sa presintong kasamtangang nagbantay nga maapod og patrolya ang maong mga lugar.