Imahen moduaw sa Mandaue; andam na

Hingpit nga gipangandaman sa kapolisan ang pagduaw sa imahen ni Senior Santo Niño sa dakbayan sa Mandaue nga gikatakda karong umaabot Biyernes sa Enero 13 niining tuiga.

Ang Presinto 2 sa barangay Subangdaku ug Presinto 1 sa Centro sa nahisgotang dakbayan maoy gitahasan ni Mandaue City Director Senior Superintendent Eduardo Catabas sa pagpatuman sa kahapsay ug kalinaw.

Ang matag tuig nga pagduaw sa imahen ni Senior Santo Niño sa dakbayan sa Mandaue maoy kabahin sa mga kalihukan sa dayon na nga pagpahigayon og Sinulog nianang adlaw nga Domingo nga maoy kapistahan niini.

Ang imahen ni Senior Santo Niño nga mogikan sa Basilica Minore del Santo Niño isakay sa karo uban usab sa imahen sa Birhen sa Guadalupe nga maoy patron sa dakbayan sa Sugbo.

Ang mga opisyal sa kagamhanan nga pangulohan ni Bise Mayor Michael Rama ug mga debotos niini maoy mokuyog sa motorkada nga pagahimuon nga mosubay sa dalan M.J. Cuenco Avenue.

Ang mga debotos ug mga opisyal sa dakbayan sa Mandaue nga pangulohan ni Mayor Thadeo Ouano nga mosugat ang magpaabot sa may utlanan nga bahin sa barangay Subangdaku.

Dad-on ang imahen ni Senior Santo Niño sa Saint Joseph Parish Church sa barangay Centro ug bilaran kini sa mga debotos sa tibuok gabii hangtod sa kaadlawon nga mao na usab ang pagpasiugda sa fluvial procession paingon sa dakbayan sa Sugbo.