Pawikan naluwas sa Sibonga

Usa ka pawikan nga gibana-banang 180 ngadto sa 200 kilogramo ang gibug-aton ang naluwas sa mga mangingisda sa Sibonga human kini masangit sa gialad-alad nga pisi ug nylon sulod sa 'gusoan' sa barangay Abugon sa naasoy'ng lungsod niadtong milabay'ng gabii.

Si Lourdes Pagar, ang municipal Agriculture technologist sa Sibonga mitug-an sa Banat News nga dunay sukod nga lima ka tiil gikan sa simod ngadto sa tumoy sa ikog ug 2.5 ka tiil usab ang gilapdon sa buko-buko niini.

Sumala pa ni Pagar naluwas kini sa duha ka sakop sa Bantay Dagat nga sila si Jose Tabale ug Hermanico Roilo pasado alas 6 sa gabii niadtong Martes samtang ang maong mananap naninguhang makalingkawas sa milambod nga pisi ug nylon nga gitaptan sa mga guso.

Gisuwayan unta og buhi sa dagat nila ni Roilo ug Tabale ang pawikan human kini mabadbari sa mga pisi ug nylon apan giingong luya kini kaayong molangoy maong nakadesider ang duha nga dad-on kini sa baybayon.

Gikan didto gidala kini sa panimalay ni Pagar diin dunay dakong pasong nga gibuhian usab nila og mga tilapyang isda sanglit nabalaka silang basin kun sa fountain sa munisipyo kini ibutang panamastamasan unya sa mga tawo.

Dugang pa ni Pagar nga mismong ang mga mananagat sa ilang lugar mihulagway nga "unique" kaayo ang maong matang sa pawikan nga nakuha diha sa ilang dagat lahi ra sa uban.

Si Protected Area and Wildlife Division chief, Donnel Kho sa Deparment of Environment and Natural Resources 7 sa pakighinabi sa Banat News mibutyag nga maayo ang gihimong pagsalbar sa mga taga Sibonga sa maong pawikan.

"Laudible ug consistent kaayo sa wildlife conservation program sa atong gobiyerno ang ilang gibuhat," asoy pang Kho human mahibaw-i gikan sa Banat News ang gihimo sa taga Sibonga nga gibuhian kini sa buntag kagahapon.

Matud pa niya ang gidak-on ug gibug-aton nga gitug-an ni Pagar sa Banat News posibleng "leatherback," "green sea turtle" o ba kaha "hawksbill turtle" ang maong pawikan apan wala siya makasiguro gumikan kay wala niya kini makita sa personal.

Ang Pilipinas, Indonesia ug Malaysia dunay gilagdaang tri-national conservation plan niadtong 2004 nga nagtabang pagkonserbar sa mga pawikan sa kadagatan ilabi na sa mga utlanan niini diin malakip ang "turtle islands" diha sa Mindanao.