2-polis sa Parian buot ipalabay

Duha ka polis nga nadestino sa Parian police station gitinguha karon nga ibalhin og destino sa laing dapit gawas sa dakbayan sa Sugbo tungod sa pagpanghasi sa mga tanod nga midakop og mga drug users.

Ang kadagkoan sa Police Regional Office (PRO-7) giawhag na nga ang duha ka polis nga sila si SPO1 Rodolfo Morales ug PO3 Dhonel Salazar wagtangon gikan dinhi sa dakbayan sa Sugbo.

Ang konseho sa barangay Lorega-San Miguel nga gipangulohan ni Kapitan Fortunato Parawan, usa ka opisyal sa Association of Barangay Councils (ABC), maoy mihimo sa maong awhag.

Ang mga tanod gikatakda usab nga mopasaka og kasong administratiba batok sa duha ka polis sa People's Law Enforcement Board (PLEB) kay ang reklamo ila nang gipaabot ngadto ni Bise Mayor Michael Rama, ang chairman sa Police Coordinating and Advisory Council (PCAC).

Ang mga tanod sa Lorega-San Miguel misaysay nga niadtong gabii sa petsa 8 sa Disyembre sa miaging tuig samtang diha sila sa barangay hall nakadawat sila og alarma nga dunay armadong tawo nga nasigpatan didto sa usa sa ilang mga sityo.

Pag-abot sa mga miresponde nga tanod didto sa maong dapit, gitug-anan sila sa mga tawo sa maong lugar nga ang giingong armadong tawo misulod sa usa ka bakanteng luna nga naghingos og shabu.

Ang nadakpan atol sa maong higayon, mao si Glenton Alterado, taga Lorega-San Miguel nga nasakmitan nila og .38 kalibre nga rebolber nga walay bala.

Ang mga tanod miingon nga gidala nila sa Parian police station ang mga dinakpan ug giimbestigar ni SPO4 Jose Mangaran. Apan kalit lang miabot ang duha ka polis nga sila si Morales ug Salazar.

Nasuko ang duha ka polis kay matud pa walay firing pin ang armas nga gitugyan sa mga tanod ug natahap sila nga giilisan sa mga tanod ang maong armas.

Kini maoy rason nga ang mga tanod gipangrekisa sa duha ka polis ug mipasangil pa ang usa sa mga tanod nga gitionan pa sila og armas.