2 surambaw sa bulangan gipadakop, pasakaa'g kaso

Gibalhog sa bilanggoan ang duha ka sugarol og manok human masakpi nga mo-surambaw unta sa sugal pinaagi sa pagpiang daan sa pako sa gitari nga manok ug didto sa kontra mopusta.

Nahitabo kini sa sulod sa D and C Enterprises nga nahimutang sa Ibabao Estancia, siyudad sa Mandaue alas 7 pasado ang takna sa miaging gabii.

Gipasakaan og kasong pagpangilad sila si Egnacio Alburo, 35 anyos, minyo ug Nicolas Tapangan, 30 anyos, nga pulos taga barangay Guadalupe sa dakbayan sa Sugbo.

Ang nagdakop sa mga suspetsado mao ang mga barangay tanod sa Ibabao nga sila si Tranquilino Mejares ug Patricio Ruiz.

Ang pipila ka mga sugarol nga gikahinabi sa Banat News miingon nga namatikdan sa koyme nga may deperensiya ang pako sa manok nga gitari sa duha ka dinakpan.

Sumala pa nga wala ipadayon sa koyme ang pagbuhi sa gitari nga manok sanglit gipahibalo pa sa koyme ang tag-iya sa manok nga kontra sa manok nga gitari sa mga suspetsado.

Ang uban nga mga sugarol nga nakapusta na nag-iyahay sa pagbawi sa ilang gisugal nga salapi ug ang pipila ka sugarol nga wala makapugong sa kalagot ang kalit lang mihamag sa duha.