Samdan nga midangat sa tambalanan ang managtiayong sila si Gaudioso ug Merlita Godinez lakip na ang ilang katabang nga si Andres Sumabong human pamusila sa nag-inusarang tulisan niadtong gabii sa adlaw'ng Domingo.
Sumala pa ni SPO1 Manuel Allan Tan sa pakighinabi sa Banat News nga nanghipos na ang tulo sa tindahan dihang giduol sa usa ka wala mailhing lalaki nga misuway og labni sa bag nga gisipitan ni Merlita.
Apan si Gaudioso nakamatikod sa tinguha sa suspek maong dali niyang gikuha ang bag sa iyang asawa apan niining tungura mibunot og wala matinong kalibre sa armas ang suspek ug gipusil silang tulo.
Naigo si Merlita diha sa iyang kuyamoy, si Gaudioso diha sa liog ug ang nagrabehan mao si Sumabong kinsa naigo diha sa tiyan. Human sa insidente daling miikyas palayo ang suspek.
Nasayran sa kapolisan nga dunay kaubang usa ka babaye ug usa pa ka lalaki ang suspek sanglit dihang nangikyas nakit-an kini sa mga estambay sa merkado nga nagdaling nanagan palayo.
Ang mga biktima daling gidala sa usa ka pribadong tambalanan dinhi sa Sugbu samtang gihimoan pa og dugang imbestigasyon ang maong kaso.