Catabas bag-ong hepe sa Mandaue

Ang pagsumpo sa mga ilegal nga kalihukan sa kabarangayan maoy gitinguha ni Mayor Thadeo Ouano nga hatagan og dakong pagtagad ni Sr. Supt. Edgardo Catabas nga moasumer sa katungdanan isip direktor sa kapolisan karong adlawa.

Gipadayag ni Ouano sa Banat News sa gihimong pagpakighinabi kaniya kagahapon nga si Catabas gikan sa Siquijor Provincial Police Office (SPPO) gikatakdang kuyogan ni Sr. Supt. Pablo Florante Lamosao Jr nga miretiro na sa katungdanan sugod Enero 3, 2006.

Matud pa ni Ouano nga ang pagpadayon sa pagpatuman sa kahapsay ug kalinaw sa kapolisan nga pangulohan ni Catabas mao gayod ang iyang gilauman.

Gipasabot ni Ouano nga ang pagkuyanap sa ilegal nga drugas ug video karera machine mao gayod ang labing gikinahanglan alang sa pagpadayon sa kahapsay ug kalinaw sa dakbayan.

Dugang pa ni Ouano nga dako ang iyang pagtuo nga si Catabas ang adunay igong katakus sa pagpadayon sa kahapsay ug kalinaw isip usa usab ka matinud-anong moserbisyo sa katungdanan.