Magellan's cross vendors papahawaon na - Tomas

Gitagalan na lang kutob karong sunod semana ang manindahay diha sa palibot sa makasaysayanong Magellan's Cross Park atubangan sa karaang Cebu City Hall ug kun mapakyas ang mga vendor pugsanon silang demolison sa kagamhanan sa dakbayan.

Kini maoy pahibalo ni Mayor Tomas Osmeña base usab sa rekomendasyon nga gihatag sa Cebu City Parks and Playgrounds nga misugyot og "No Vendors" policy sa mga parke.

Tuyo sa CCPP mao ang pagmentinar og limpyong palibot sa mga parke sa dakbayan diin nakitang kasagarang nakaingon sa kahugaw sa mga parke mao ang vendors nga wala usab magpakabana nga bisan asa lang ilabay sa ilang mga kustomer ang mga basurang diha napalit kanila.

Si Gerry Marquez ang consultant sa Urban Poor nagkanayon kagahapon nga ipadangat nila karong adlawa ang pahibalo sa gibana-banang 20 ka mga vendors aron boluntaryong moguba sa ilang mga stalls sulod sa pito ka adlaw.

Si Konsehal Nestor Archival ang tsirman sa CCPP nagkanayon nga gibase sa City Ordinance No.1247 ang maong polisiya nga nagmandong ang Parks and Playground Commission ra ang dunay hurisdiksyon sa mga parke ug nalakip niini ang Magellan's Cross.

Matud pa ni Archival ang mga parke karon sa dakbayan mas merkado pang tan-awon kaysa sa tinuoray nga kapuslanan niini gumikan sa kadaghan sa mga naninda.