Duha arestado ni Dumpit

Bwena mano karong tuiga ni SPO1 Adonis Dumpit mao ang pag-aresto sa duha ka mga lalaking giingong naaktuhang nanuyop sulod sa usa ka balay samtang si Dumpit ug usa ka sakop sa Barangay Intelligence Network migukod sa usa ka tulisan.

Naaresto ang mga suspek nga sila si Gregorio Pagalan,48, minyo ug Engelbert (apilyedo gipugngan) ,15, diha sa Sitio Silangan, Barangay Tejero ning dakbayan niadtong alas 12 pasado sa Enero 1.

Sumala pa nga si Dumpit uban ni Rodillo Noble mitubag sa alarma human dunay gitulis dili layo sa gikahitaboan maong dihang ilang gisulod ang maong dapit nasigpatan nila ang mga shabu paraphernalia nga nagpasad sa silong sa balay ni Pagalan.

Nunot niini gisulod nila ni Dumpit ug giaresto ang duha diin nakuhaan pa si Pagalan og usa ka paketeng may sulod nga gituohang shabu. Ang duha gitanggong na karon sa karsel sa kapolisan ug napasakaan na og kaso kagahapon.