Pamilya nalunod

Masulob-on ang Bag-ong tuig sa usa ka pamilya dihang nasugamak og aksidente sa dagat nga mikalas sa tulo kanila ug bugtong ang usa pa ka tuig nga ilang anak kinamanghuran mao ray naluwas diha sa kagaangan (reef) sa Sitio Cayangon, Barangay North Granada lungsod sa Boljoon.

Nangalumos ang managtiayong Marlon Abriol, 26, asawa niining Lucena ug tulo ka tuig nga anak nga si Wendel pulos molupyo sa barangay Banilad dakbayan sa Mandaue human mitikyaob ang ilang gisakyang pumpboat uban sa upat ka higala ug kabanay uban ang kinamanghurang anak nga si Myla.

Si SPO1 Rico Romaguera sa pakighinabi sa Banat News mibutyag nga nag-boating ang banay'ng Abriol sa maong dapit luwan sa pumpboat nga gi-operate ni Kevin Bequilla anak sa tag-iya niining si Lope nga taga Barangay North Granada sa maong lungsod.

Uban sa pamilyang Obreol ang mga igsuon ni Lucena nga sila si Alma Licayan,20, Flordeliza Licayan, 21, mga higalang sila si Gerald Davide, 21, taga Argao ug ang operator nga si Bequilla.

Sigun pa ni Romaguera ang paghangin-hangin nga nakamugna og dagkong balod maoy nakaingon sa insidente, gituohang naratol ang mga sakay niini dihang mitakilid paghapak sa balod ang pumpboat nga giingong paigo ra unta sa tulo ka tawong sakay apan gikargahan og walo ka tawo.

"Sakayan ra man na siya, high-tech na lagi ron gibutangan nila og makina, pero tulo ra gyud ka tawo ang madala adto overloaded gyud lagi sir,"asoy pang Romaguera kinsa miingong padunggo na unta ang maong bangka apan pag-abot diha sa gibana-banang pito ngadto sa walo ka tiil nga gilawmon nahitabo ang aksidente.

Dugang pa ni Romaguera dili makamao molangoy ang nangamatay ug ang mga mananagat lang sa duol maoy midugok aron tabangan ang mga kaubanan nilang naglutaw diha sa mikulob nga bangka samtang ang usa ka tuig nga si Myla diha gipakapyot sa bangka.

Sumala pa nga si Marlon Abriol maoy mikamas pag-ayo aron mapakapyot sa nakulob nga bangka si Myla una pa kini makabuhi ug mitidlom sa ilawom, patay na kini dihang nakaplagan uban sa iyang asawa ug anak nga si Wendel.

Ang mga survivor nga sila si Bequilla, Davide, magsuong Licayan ug si Myla daling gidala sa Oslob District Hospital.