Taga-Kapitolyo wa mag-uyon

Walay nakauyon sa mga opisyal sa Kapitolyo sa pamahayag sa kanhi Senador Sonny Osmeña nga tangtangon si Presidente Gloria Macapagal Arroyo ug ibalik si kanhi Presidente Joseph Estrada sa gahum.

Matud pa ni Gobernador Gwendolyn Garcia nga dili haum nga si Osmeña nga mohatag og sulbad sa problema sa nasud nga mismo siya dunay problema nga sulbaronon.

Gani gihulagway ni Garcia si Osmeña nga unstable maong dili takus nga manginlabot sa stability sa nasud.

Samtang tulo ka sakop sa hunta probinsiyal sa Sugbo nga alalay ni Osmeña ang wala usab makauyon sa iyang pamahayag.

Matud pa ni Bokal Antonio Almirante, Jr. nga humana ang termino ni Estrada ug wala nay katungod nga moangkon gihapon nga siya ang presidenti bisan gikwestiyon pa ang iyang pagkalagpot sa katungdanan.

Sa iyang bahin si Bokal Victor Maambong miingon nga kinahanglan mosandig si Osmeña sa balaud kon gusto kini og stability sa nasud.

Matud pa ni Maambong nga stable na ang Sugbo bisan unsa pa nga panahon ug bisan kinsa pa ang mangulo sa nasud.

Si Bokal Agnes Magpale miingon nga wala na siyay nakitang rason nga samukon pa ang pamunoan ni Arroyo sanglit ang tanan nagsubay man sa husto.

Mismo ang labing suod nga higala ni Osmeña nga si Kongresista Antonio Yapha, Jr. wala usab nakauyon sa pamahayag sa kanhi senador.

Matud pa ni Yapha nga kon maoy nasulod sa hunahuna ni Osmeña, iya usab kanang opinyon.- Gregg M. Rubio