Subasta sa CPA properties way palit

Wala g'yoy bisan usa nga gustong mopalit sa kabtangan sa Cebu Port Authority nga gisubasta sa City Hall kagahapon. Gisubasta ang maong mga kabtangan kay wala na kini bayri og buhis sa CPA nga miabot na og P170 milyones.

Basi sa balaod "automatic" nga ang katigayonan mapanag-iya sa dakbayan sa Sugbo kon walay mopalit, apan ang CPA may katungod gihapon nga mopalit pagbalik sa maong mga real properties sulod sa usa ka tuig.

Ang 13 ka lainlaing kabtangan nga iya sa CPA naglangkob sa mga yuta ug building ang gisubasta ngadto sa publiko kagahapon, apan wala g'yoy naikag pagpalit.

Gituohan nga walay gusto nga mopalit sa kabtangan sa CPA kay nasayod sila nga daku pa kaayo ang kombati nga mahitabo sa pag-angkon sa maong mga real properties.

Nangangkon ang kadagkoan sa City Hall nga may katungod ang dakbayan sa Sugbo pagkolekta og real property tax gikan sa CPA, apan ang mga abogado sa CPA lahi usab og baruganan.

Ang mga abogado sa CPA miingon nga isip "costudian" lang sa kabtangan nga iya sa nasudnong kagamhanan, ang CPA dili angay'ng pabayron og buhis.

Kaniadtong miaging tuig, 18 ka laing real properties sa CPA ang giangkon na sa City Hall sukad kaniadtong Hulyo human nga wala sab g'yoy mipalit niini atol sa gipahigayon nga subasta.

Wala pa hinoon masuta kon kanus-a nga ang dakbayan mao nay modumala sa nahisgutang kabtangan.

Si mayor Tomas Osmeña nakadawat og "aviso" nga ang CPA andam mobayad og P80 milyones nga compromise pay ngadto sa City Hall, apan ubos sa kondisyon nga ang CPA dili na mobayad og dugang buhis sa ilang kabtangan sa umaabot nga katuigan.

Miingon si Osmeña nga mouyon siya nga ang principal lang nga kantidad sa buhisan sa CPA maoy ilang bayran, ug dili na iapil ang multa tungod sa kalangan nila pagbayad.

Gibutyag sa mayor nga kon ang maong kaso dad-on na sa mga abogado sa City Hall ngadto sa hukmanan, dili na siya modawat og compromise pay.

Samtang ang City Hall naninguha nga makakolekta og buhis gikan sa CPA, ang Commission on Audit mitataw nga daghan pa sa mga kabtangan ang wala pa hingpit nga mapanag-iya sa CPA.

Ang rekord sa COA nagpakita nga ubay-ubay'ng kabtangan nga gituohang iya na sa CPA, apan ang maong mga katigayonan narehestro pa gihapon sa Philippine Ports Authority.