Sikyu, sibilyan apil sa did-an pabuto'g armas

Giapil na usab karon ang mga sibilyan nga dunay kaugalingong mga armas ingon man ang mga security guard nga gidid-an nga makapabuto sa ilang armas atol sa pagsugat unya sa Bag-ong Tuig karong tungang gabii.

Giluwatan kining maong pahibalo sa hepe sa Firearms Explosives and Security Agency and Guard Supervisory Section sa Police Regional Office (PRO-7) Supt. Rey Lyndon Lawas.

Hinuon, gitambagan ni Lawas ang publiko nga mas maayo nga mogamit na lang kini og mga ordinaryong firecrackers o ba kaha mga lata nga gamiton pagsabasaba pagsugat sa Bag-ong Tuig.

Tumong ug tuyo sa maong panawagan sa PRO-7 aron malikay ang publiko gikan sa aksidente mugna sa mga motumaw nga indiscriminate firing nga sagad motumaw sa matag higayon nga saulogon ang pagsugat sa Bag-ong Tuig.

Nunot niini, giawhag ni Lawas ang mga Security Agency sa pag-monitor sa mga nag-duty niini nga guwardiya karong gabii aron mahibaw-an kadtong mipasalba sa ilang mga armas.

Matud ni Lawas mamahimong mapasakaan og kasong kriminal kadtong mga guwardiya ug sibilyan apil na ang kasong administratiba kun masakpan kini nga makalapas sa maong pahimangno.

Sayo ang PNP mipahibalo sa kapolisan ug militar nga gidili ang pagpabuto sa service firearms niini atol sa pagsugat sa Bag-ong Tuig ug kadtong masakpan nga makalapas niini namiligrong mataktak sa serbisyo.

Kasagaran sa mga polis nga nadestino dinhi sa dakbayan sa Sugbo ang gipama-atan na ang ilang mga armas kun gi-silyohan aron mahibaw-an kon mopasalba kini sa ilang mga armas.