Dead on arrival sa Cebu Doctors Hospital ang biktimang si Shewakram ug ang higala niining si Norberto Rodriguez alyas Intong, samtang nakadagan palayo si Lando Rodriguez manghod ni Norberto.
Upat ka tawong pulos nagbonnet ug naghelmet sakay sa duha ka motorsiklo ang miabot gikan sa dalan D. Jakosalem ug mihunong tungod sa awto ni Nikki dayong kanaog sa duha ka backrider.
Matud pa sa mga nakakita sa hitabo gidung-aw sa tuong bintana sa awto ni Nikki ang armas sa usa sa mga suspek diha mismo duol sa nawong sa asawa ni Nikki nga si Cheche kinsa naglingkod sa sulod sa awto uban sa iyang anak dayong pusil kang Nikki diha sa kilid sa giablihang walang pultahan sa front seat.
Human maigo si Nikki daling misutoy si Lando kinsa miingong gisugat siya sa usa pa ka suspek dayong pusil duha ka higayon apan mikagar ang armas maong nakatago siya samtang nahibilin ang iyang maguwang nga naghupo duol kang Nikki.
Dihang misuway og dagan si Rodriguez diha na siya napusilan makadaghang higayon sa kalawasan, human sa pagpamusil miikyas ang suspek palayo subay sa dalan Simuon.
Unang gitabang sa mga silingan si Rodriguez sakay sa usa ka taxi samtang gisunod si Nikki dihang dunay nimaneho sa iyang awto padulong sa Cebu Doctors Hospital apan gideklarar kining patay na, samtang nakabsan usab sa kinabuhi si Rodriguez.
Si Shewakram matud pa sa opisyal sa Criminal Investigation and Intelligence Branch, Supt. Pablo Labra sa pakighinabi sa mga tigbalita makadaghang higayon nang nasikop gumikan sa mga kasong pagpanglungkab og awto, drogas ug uban pang iligal nga kalihukan.
Samtang si Rodriguez matud pa sa iyang igsuong si Lando sa pakighinabi sa Banat News nga nasulod na sa Bagong Buhay Rehabilitation Center makausa gumikan usab sa paghupot og shabu apan mibutyag kini nga wala kini malambigit sa mga pagpangawat ug pagpanulis ug nagtuong napagan lang ang iyang maguwang sa pagpatay kang Shewakram.
"Napagan lang lagi 'to siya kay wala man na siya mag-apil apil anang mga binuang, ako gani pasalamat lang ko kay gikaluy-an ko wala kabuto 'tong armas maong nakadagan ko," sumala pang Lando.
Nagtuo ang CIIB nga posibleng kaatraso ang mihimo niini o ba kaha may kalambigitan sa drogas. Dose ka basiyo sa kalibre 45, usa ka buhing bala, tulo ka slugs ug usa ka syringe ang narekober diha sa crime scene.
Samtang sayo pa niana usa ka Arturo Vinloan, 31, ang gisulod diha sa ilang bilyaran sa dalan Gil Tudtud, Mabolo sa duha ka wala mailhing tawong dunay duha usab ka kaubang back-up luwan usab og duha ka motorsiklo nga pareho og diskripsyon sa mitipi kang Shewakram ug Rodriguez.
Ang mga suspek kalit lang mipusil sa biktima makadaghang higayon diin tulo niini ang igo sa ulo ug tulo usab sa lawas nga hinungdan sa hinanali niining kamatayon.
Sa gihimong imbestigasyon ni SPO2 Rey Cuyos nasayran nga ang biktima igsuon sa gitumbok nga suspek sa pagpatay sa usa ka kanhi ex-Scout Ranger sa Army nga si Mario Recla diha sa Barangay Hipodromo sa miaging semana.
Ang tulo maoy nadugang sa 107 na nga biktima sa "vigilante style killings" dinhi sa dakbayan sukad niadtong Disyembre 22,2004.
Kagahapon sa buntag napalgan diha sa barangay Sudlon 2 ang nabulit sa samad pinusilang lawas ni Joel Mesabella, hingkod ang panuigon molupyo sa nahisgutang dapit kinsa nag-uma sa maong lugar.
Matud pa nga ang biktima ulahing nakitang mipauli padulong sa ilang balay pasado alas 7 na sa milabay'ng gabii human motan-aw og telebisyon sa silingan, apan pila ka gutlo sa pagbiya niini dunay nadunggang nagsunod nga buto sa armas ang mga residente.
Pagkabuntag na mapalgi sa iyang kabanay nga nagsag-ob og tubig si Mesabella nga nag-ubo diha sa kalibunan nga unang gituuhang nakatulog sa dalan gumikan sa pagkahubog, apan dihang gibalikan napuno kini og samad pinusilan sa lawas, wala pay natumbok ang kapolisan sa responsable sa pagpatay.