2006: Tuig sa iro, bati sa negosyo kun... - Go

Napanglantawan sa mga negosyante sa Cebu ang pagkalupa sa ekonomiya sa nasud ning tuiga 2006 ang tuig sa iro kung ihinayon pagpatuman sa kagamhanan ang balaod sa pagpasaka sa suholan sa mga trabahante.

Kini samtang sukwahi sa giingong debuwenas ang 2006 tungod kay "year of the dog" kini basi sa Chinese Calendar o kalendaryo sa Insek.

Matud pa ni Roberto Go, presidente sa Cebu Chamber of Commerce and Industry (CCCI) nga malagmit mosaler kining giingong tuig sa mga iro, nga buot ipasabot sungkaban ug may pagka-iro gyud ang hunahuna sa mga tawo gumikan sa kagutom.

Kini tungod kay kun pugson ang mga negosyante sa paghatag og taas nga suweldo sa mga trabahante, daghang mga negosyo ang manak-op sa ilang patigayon.

Daghan usab ang magutom, ilabi na kadtong tangtangon sa trabaho kay wala nay ikasuhol ang ilang amo.

Alang kang Go dili pa panahon karon nga patas-an ang suhol sa mga mamumuo hangtod nga makabarog ang mga negosyante aron molig-on gikan sa mga gipatumang Revised Value Added Tax (RVAT).

Apan tungod kay ipatuman kini sa kagamhanan, mapugos ang mga negosyante sa paghugot sa ilang bakos uban sa pagkaangin sa mga mamumuo nga mawad-an og trabaho inigpanira ug pagpangtang og trabahante na sa ubang mga negosyo.

Alang kang Go igo na unta nga makapalambo sa kagamhanan ang kinitaan nila sa RVAT, apan samtang molig-on ang panudlanan sa gobyerno niini, mohuyang usab ang mga dugokan sa negosyante matud pa ni Go.