Gitug-an sa executive director sa Sinulog Foundation Ricky Ballesteros, nga nakadawat na sila sa komunikasyon gikan sa mga karaang contingent sa Sinulog nga opisyal nga nagpahibalo nga dili sila mosalmot sa kompetisyon.
Kini bisan pa man og gipahibalo ni Ballesteros ang nahisgutang mga contingent nga mohatag og subsidy kun hinabang pinansiyal ang dakbayan sa Sugbo nga tag P100 mil alang niadtong mga out of town contingents.
Ang mga contingent nga dili mangapil sa Sinulog 2006 gilangkuban sa Maradjao Karadjao sa Surigao City, Tribu Placernon ug Bayawan sa Negros Oriental.
Matud ni Ballesteros bisan usa wala pa gyuy mipaabot og komunikasyon gikan sa upat ka mga contingent gikan sa Negros.
Hinuon gituohan ni Ballesteros nga kun dunay masinati nga pagkunhod sa mga contingent sa Sinulog sunod tuig masaligon siya nga gamay lang kini og deperensya tungod kay duna usay mga bag-ong contingent ang mipasalig nang moapil sa mardi gras.
Kini sama sa bag-ong contingent nga maggikan sa Masbate ug Ilo-ilo City apan wala lang una makahatag og kumpletong detalye si Ballesteros ning maong mga bag-ong contingent.
Sa miaging tuig 46 ka mga contingents ang misalmot sa Sinulog.