Sikyu milugos, midunggab botelya sa 14-anyos napusilan

Napusilan sa polis sa Talisay ang security guard kinsa suspetsado sa pagpanglugos sa usa ka 14-anyos nga batang babaye tungod kay wala kini mopatuo sa mga polis nga pabuhian ang biktima diin giluba-luba niini og botelyang buak niadtong petsa 25 niining buwana sa 1:30 sa kaadlawon diha sa compound sa Jodan Service sa Barangay Dumlog dakbayan sa Talisay.

Gawas nga giluba sa suspetsado ang biktimang si Jesica, (tinuod nga ngalan gipugngan) 14 anyos, residente sa maong barangay gibunalan pa gyud ang ulo niini og botelya.

Si Jesica nakaangkon og mga samad sa iyang nawong, ulo ug lawas diin naligo kini sa kaugalingong dugo dihang nakita kini sa kapolisan ug daling gidala sa Vicente Sotto Memorial Medical Center niining dakbayan.

Ang suspetsadong si Loreto Jacinto, 28-anyos, ulitawo, lumad nga taga Mangagoy, Surigao del Sur nakaangkon og samad pinusilan sa duha ka tiil human kini pusila ni Inspector Gil Limosnero gamit ang 9mm niini nga service firearm.

Matud pa ni PO3 Renato Abellar polis sa Talisay sa pakighinabi niini kagahapon sa Banat News nga naabtan sa alert team pinangulohan ni Limosnero ang bata nga nagsinggit nga nangayo og panabang diha sulod sa bodega sa maong lugar.

Gipugos sa pag-abli sa mga polis ang pultahan sa maong bodega diin ilang naabtan si Jacinto nga nagsige og luba sa biktima ug gimandoan kini sa mga polis nga pabuhian niini ang bata apan nagmagahi kini hinungdan nga gipusil kini ni Limosnero.

Si Abellar nagkanayon nga sa wala pa mahitabo ang insidente si Jacinto misulong ngadto sa balay sa biktima ug gihasi ang mga ginikanan niini.

Nakit-an ni Jacinto ang bata didto sa balay ug giguroy kini ngadto sa nahisgutang bodega og giamong-amongan.