PDEA agent namusil

Usa ka sakop sa Philippine Drug Enforcement Agency (PDEA) 7 ug usa usab ka kanhi polis ang namusil niadtong Disyembre 24 gikan sa managlahing dapit.

Samdan ang usa ka Wilberto Laurente , 50, anyos residente sa Sityo Laray Barangay San Roque dakbayan sa Talisay human kini gipusil ni PO2 Frederick Ronduen nagpuyo diha sa Greenfield subdivision sa maong lugar

Si Laurente nakaangkon og samad pinusilan sa walang bahin sa likod nga abaga diin ang bala milahos sa atubangan.

Sumala pa sa anak ni Laurente nga si Shirley Rosal sa pakighinabi sa Banat News giingong nangangkon si Ronduen nga duna siya'y gigukod nga duha ka suspetsadong drug pusher nga diha midagan sa maong dapit nga iyang gipusil, apan natumong nga miagi si Laurente kinsa padulong sa usa ka salo-salo diha sa Caballero compound.

Apan dihang gisusi ni Ronduen ang dapit maoy iyang nakit-an si Laurente nga maoy naigo ug dili ang duha ka gisuspetsahang drug suspects nga iyang gipunting, giingong imbes nga dad-on ang biktima sa tambalanan misuway pa og ikyas si Ronduen hangtud nga gipugngan siya sa mga residente ug gidis-armahan sa tanod nga si Fredo Ornopia.

Ang suspetsadong si Ronduen nagdumili usab sa pagtahan sa iyang kaugalingon dihang gikumbinsir ni PO3 Renato Abellar polis sa Talisay nga patahanon sa ilang buhatan.

Dugang pa sa pasangil ni Rosal mirason ang suspek nga magpaabot nalang kini sa arrest warrant o ba kaha kun ubanan sa iyang opisyal ngadto sa buhatan sa Talisay police.

Si Laurente daling gidala sa iyang mga kabanay sa Talisay City District Hospital apan gipagawas ra dayon gumikan kay milapos man ang bala diha sa abaga niini ug mahimong sa balay nalang kini atimanon.

Sa laing bahin, usa ka kanhi polis sa dakbayan sa Cagayan de Oro ang namusil sa tulo ka tawo diha sa Barangay Liburon lungsod sa Carcar.

Ang suspek mao si Dodong Yap, residente sa Sityo Awayan sa samang barangay human kini magwala gumikan sa kahubog ug kalit nga namusil sa mga silingan.

Ang napusilan mao sila si Dario Canaya, 24-anyos, nakaangkon og samad pinusilan sa tuo nga paa, Charles Zabala, 26, nakaangkon og samad pinusilan sa walang dunggan ug likod, Jessie Cadenas, 25, nakaangkon og samad pinusilan sa iyang tiil.

Ang tulo mga residente sa Barangay Liburon sa maong lungsod dali nga gidala diha sa Jesus Memorial Hospital sa Carcar.

Base sa imbestigasyon sa kapolisan sa Carcar ang suspetsado hubog nangita ni Zabala diin aduna silay personal nga panagbangi, atol sa hitabo si Zabala kauban sila si Canaya ug Cadenas nga naglingkod sa usa ka payag og sa walay pangutana gipusil ni Yap ang tulo.

Kasamtangan gipangita karon sa kapolisan ang suspek kinsa daling miikyas human sa insidente.