Gipahibalo kini ni Osmeña atol sa press conference niini kagahapong adlawa aron dunay lugar nga kapabuthan sa mga firecrackers sa pagsugat unya sa Pasko ug Bag-ong Tuig.
Gipasabot sa mayor nga iyang napilian ang Pond F sa SRP gumikan kay mao lang kini natan-awan niya nga labing luwas nga lugar dinhi sa dakbayan alang sa mga pabuto aron malikayan ang mga disgrasya.
Kini tungod kay pabor usab ang maong lugar alang sa mga polis nga magpatrolya og lisud usab kini katagoan gikan niadtong mga tawo nga magpabadlong.
Nunot niini, gipahibalo sa mayor nga ablihan na karong sunod adlaw ang Mambaling road nga nagdugtong sa SRP aron mahatagan og kasayon kadtong mga indibidwal nga gustong magpabuto og mga firecrackers karong Pasko diha sa maong lugar.
Samtang giklaro sab ni Osmeña nga wala niya i-ban ang pagpamaligya ug pag-display sa mga firecrackers sa mga sidewalk ug aseras sa Colon.
Kini tungod kay matud ni Osmeña dili siya pabor nga mopatuman og mga palisiya nga dili hingpit nga ma-implementar sa kapolisan.
Bugtong i-ban sa mayor mao kadtong mga piligroso na nga pabuto nga susama na gayud og mga eksplosibo nga kuyaw na nga makapatay og tawo sa higayon nga aksidente kining mobuto ug ingon man gitambagan usab niya ang publiko nga dili magpataka og gamit sa watosi ngadto sa ilang mga anak gumikan kay piligro kining makahilo.